Laləni tülpanı dərmək istəsən

Sinənin üstünə sərmək istəsən

Qardaş biz tərəfi görmək istəsən

Dağlar yaşıl tuman geyinəndə gəl

Qaranlıq ünüynən işıq səsiynən

Kasa dolmağıynan qaşıq səsiynən

Rəssam fırçasıynan aşıq səsiynən

Şair şeiriynən öyünəndə gəl

Qurğuşun əriyib qırma olanda

Tüfəngin halını sorma dolanda

Arpa kirkirədə yarma olanda

Buğda dəyirmanda üyünəndə gəl

Yoxa cansızlaşıb həyə canlanıb

Çadırlar qurulub dəyə canlanıb

Sevincdən fərəhdən həyəcanlanıb

Ürəyim gupba gup döyünəndə gəl

Atadan anadan qardaşdan küsüb

Gördüyün hər dağdan hər daşdan küsüb

Yoldaşdan inciyib sirdaşdan küsüb

Dədə Anar Amin deyinəndə gəl